Le duperia del revolution agricole del annos 1960

(Per Bernard Conte)

Le revolution verde es le resultato del instauration del agricultura productivista in Europa post le secunde guerra mundial. Sub le pretexto del lucta contra le fame in le Tertie Mundo, le revolution verde ha essite un instrumento major del destruction del societate traditional e del integration del agriculturas del Sud in le mundialisation, e lor domination per le firmas multinational agroalimentari.

In le curso del annos 1950-1960, le Banca mundial e alicun fundationes private, particularmente le fundationes Ford e Rockefeller, financiava le recerca agricole in le paises in disveloppamento. Iste recerca duceva al elaboration de nove varietates de cereales de rendimento elevate que deberea coperir le crescente besonios alimentari del paises meridional.

In effecto, le expertos pretendeva que le varietates de cereal traditional, characterisate per un rendimento debile, non poteva affrontar le crescimento del demanda generate per un demographia galopante. Le introduction in le agriculturas del Sud de iste nove varietates de rendimento elevate (VRE) prendeva le nomine de «revolution verde», lanceate in 1965. Il se tractava de solver le problema del fame in le mundo per le application de saper scientific per un programma american de diffusion de technicas agricole occidental. Le revolution verde affectava Asia, le Medie Oriente, America Latin, e Africa del Nord, sed illo pauco concerneva Africa subsaharian.

Le introduction del VRE provocava le «modernisation» del agricultura in un grande numero de paises meridional. Iste varietates, plus receptive al usage del fertilisantes e del irrigation, permitteva de plus que disduplar le rendimento del culturas de ris e frumento in le principio. Le acceleration del crescentia del production agricole representava, secundo le expertos, un importante contribution al autosufficientia alimentari, un reinfortiamento del capacitate de exportation del productos alimentari de base, e un accrescimento del excedentes agricole permittente de financiar le disveloppamento.

Ultra le accrescimento del rendimentos e del production a curte termino, le revolution verde causava numerose effectos perverse al nivellos ecologic, economic, e social.

Le effectos perverse del revolution verde

Al nivello ecologic, le revolution verde se traduceva per: (i) le reduction del biodiversitate; (ii) le augmentation del sensibilitate del VRE al maladias (le varietates traditional se revelava plus resistente); (iii) le impovrimento del solos e lor degradation per le cultura intensive; (iv) le irrigation intensive e le utilisation massive de fertilisation e pesticidas causava le contamination del solos e le salinisation de territorios vaste; (v) le equilibrio ecologic ha essite rumpite a causa del monoculturas e del empleo massive de pesticidas destruente un parte del fauna, inter altere cosas.

Al nivello economic, viste le necessitate de utilisar un systema technologic constituite de machinas agricole e de productos chimic fabricate in le paises del Nord, le revolution verde ha progressivemente augmentate le dependentia del paises concernite super le companias multinational del industria agroalimentari. Ergo le agricultura del Sud deveniva ancora plus tornate verso le exterior e plus integrate in le circuitos mundial de excambios. Gratia al revolution verde, sub pretextos laudabile (humanitari e caritabile), le interprisas multinational del Nord succedeva sasir un grande parte del sector agricole del Tertie Mundo. In ultra, le comenciamento del revolution verde se faceva gratia a prestos bancari, particularmente del Banca Mundial, que participava al aggravation del debita del Tertie Mundo.

Al nivello social, le revolution verde reverteva le edificio traditional. De un latere, illo se realisava al detrimento del benes commun (pasturas, forestes…) del quales profitava le stratos le plus povre del population. Al imagine de Europa duo seculos plus tosto, iste movimento de enclosure (le passage de un forma communitari a un forma individualistic de economia agrari) causava un phenomeno de disintegration social, jectante al mercato de travalio un mano de obra «libere» malleabile e obligabile per a un salario a pena sufficiente pro lor subsistentia. Del altere latere, le revolution verde introduceva un technologia estranie que le agricultores non vermente maestrava, assi creante un dependentia technologic verso le industria del Nord. De plus, le cultura del VRE e le systema technologic que lo supporta (material agricole, fertilisantes, pesticidas, herbicidas…) propulsava le agricultores a in un cyclo de indebitamento crescente que, pro multes, deveniva insustenibile. Iste agricultores debeva finalmente vender lor terras al bancas e al grande proprietarios de terras. Definitivemente, le revolution verde modificava le structuras social e accelerava le exodo rural que accresceva le populationes del quartieros povre, aggravante le disoccupation e le paupertate.

Le revolution verde participava al adjustamento requirite per le systema

Como scribeva Lise Cornilleau et Pierre-Benoît Joly, le revolution verde es un «ingerentia inedite in le affaires interior de numerose paises extra le contexto colonial; illo cerca a compensar su manca de legitimitate democratic per reclamar se del imperativo moral de succurrer le affamatos, lo que entra in resonantia con le spirito messianic american. Illo se appoia etiam super un presumite efficacitate, inscenate per le contos epic de victoria del technologias «moderne» super le fame. Le revolution verde merita esser qualificate de «instrumento global de governamento», nam illo remodellava le politicas agricole e alimentari de un grande numero de paises verso un projecto politic mundial promovite per le fundationes philanthropic american, lo de submitter le paisanos del Sud a un catena de dependentias economic e cultural del industrias (agroindustrial e petroler) e del institutiones academic del Nord.»

Le rolo del Statos ha essite determinante in le application del revolution verde. In effecto, illos ha «financiate massivemente – con appoios international – le infrastructuras de irrigation. Illos instaurava un apparato parapublic de grande talia: recerca public, organismos de vulgarisation, interprisas public de approvisionamento de productos agricole, officios public de acquisition, organismos public de credito. Le Stato ha subventionate le fertilisantes e le productos de tractamento, le precios agricole, le precios al consumption, e le credito».

Le Statos se comportava como bon agentes del systema. Illos destrueva le structuras ancian e creava noves plus conforme al disveloppamento del projecto mundial. Le nove dependentias create revelara lor utilitate al momento de passar al proxime stadio del neoliberalismo. Le instrumentalisation del Statos pone le question del responsabilitate del élites national in le governamento: incompetentia, naivitate o complicitate?

Fonte: https://mobile.agoravox.fr/tribune-libre/article/l-arnaque-de-la-revolution-verte-231026