(AFP)
Le secretario general del Organisation del Nationes Unite (ONU) Antonio Guterres deplorava, lunedi le 22 de februario, que le epidemia de Covid-19 es utilisate per certe paises, que ille non nominava, pro facer tacer le «voces dissonante» e le medias.
«Invocante le pandemia como pretexto, le autoritates de certe paises prendeva mesuras de securitate sever e mesuras de urgentia pro reprimer le voces dissonante, abolir le libertates le plus fundamental, facer tacer le medias independente, e impedir le travalio del organisationes non governamental», regrettava le chef del ONU in su discurso annual ante le Consilio del derectos del homine (CDH).
Sr. Guterres exprimeva se in un message video preregistrate al occasion del apertura del 46e session del CDH que, pro le prime vice in su historia, occurreva totalmente in-linea (usque le 23 de martio) a causa del epidemia de Covid-19.
Ben que le formato in-linea limita le excambios inter le delegatos, «le aspecto positive es un participation que on nunquam videva in le passato» in le Consilio, se felicitava le ambassador suisse al ONU, Genève Jürg Lauber.
Plus que 130 chefs de stato, de governamento, e ministros se exprimera in le curso del tres prime dies del session, inter le quales le presidente venezuelan Nicolas Maduro e afghan Ashraf Ghani lunedi.
Le Secretario de Stato american Antony Blinken prendera le parola mercuridi, marcante le retorno, sed solmente como observator, del Statos Unite in iste spatio international, que illo habeva quitate con fracasso in 2018 sub le impulsion del ex-presidente Donald Trump.
Le chef del ONU consecrava un grande parte de su discurso al pandemia, deplorante que le restrictiones que es ligate a lo «servi de excusa pro minar le processos electoral, debilitar le voces del opponentes, e reprimer le criticas».
Assi ille addeva, «defensores del derectos del homine, jornalistas, advocatos, activistas, e mesmo professionales del sanitate ha essite le objecto de arrestationes, de persecution judiciari, e de actos de intimidation, e de surveliantia pro haber criticate le mesuras – o manca de mesuras – prendite pro affrontar le pandemia».
In ultra, «le accesso al informationes vital a vices ha essite impedite, durante que le disinformation mortal ha essite amplificate, inclusemente per alicun dirigentes», ille continuava, sin dicer le quales.
«Fallimento moral»
Le Alte Commissario del ONU al derectos del homine, Michelle Bachelet, anque denunciava «le restrictiones illegitime del libertates public (e) le utilisation excessive de poteres de urgentia» in le contexto del epidemia.
«Le utilisation de fortia non ponera un fin a iste pandemia. Inviar le criticos al prision non ponera un fin a iste pandemia», illa martellava, sin tamen mentionar ulle pais.
Le Covid-19 ha equalmente «aggravate le vulnerabilitates» e revertite le vita de centenas de milliones de familias qui perdeva un empleo o videva lor salarios se effunder, se inquietava Sr. Guterres.
«Le pandemia ha affectate de maniera disproportionate le feminas, le minoritates, le vetules, le homines in un situation de handicap, le refugiatos, le migrantes, e le populos autochthone» e «le paupertate extreme gania terreno», ille indicava.
«Annos de progresso in re equalitate del generes ha essite reducite a nihil», ille diceva.
Le secretario general del ONU ha cetero fustigate «le nationalismo vaccinal»: «le incapacitate de assecurar un accesso equitabile al vaccinos representa un nove fallimento moral que nos reinvia retro».
In su intervention, Sr. Guterres cetero appellava a «intensificar le lucta contra le resurgentia del neonazismo, del suprematia blanc, e del terrorismo de motivation racial e ethnic», e a poner in placia un action concertate al scala mundial pro poner fin a iste «menacia seriose e crescente».
Plus que un menacia terrorista interior, illos «deveni un menacia transnational», ille considerava.
Le blog de Daniel Onesra 