Al principio del mense de maio, tres casos del variola simian esseva signalate in Grande Britannia, probabilemente importate per un viagiator reveniente de Nigeria. 23 casos es suspectate in Espania e in Portugal. Le agentia sanitari public del Statos Unite, le CDC, se inquieta de un transmission communitari ultra Grande Britannia. Casos appareva in plure altere paises europee, assi como in Canada, le Statos Unite, Argentina, Israel, e Australia. Secundo le Organisation mundial del sanitate, le majoritate del casos concerne viros qui habeva relationes sexual recente con altere viros, le risco de contagion essente plus alte pro personas qui ha plure partners sexual. Le mesme organisation affirmava que le risco es multo basse in le population general. Le propagation pote ancora esser arrestate in le paises ubi le virus non es endemic.
Le 19 de maio, combattentes islamic attaccava un base militar a Madjoari, in Burkina Faso. In un communicato, le armea burnikabean mentiona un attacca complexe con tiros de mortero sequite de tiros directe sur le base. Aviones del armea interveniva, e faceva fugir le jihadistas. Secundo le stato-major burkinabean, dece-un soldatos esseva occidite e al minus vinti alteres esseva vulnerate durante le attacco. Al minus dece-cinque jihadistas esseva neutralisate per le armea del aer. Le insurrection jihadista a Burkina Faso comenciava in 2015 inter le governamento burkinabean e gruppos salafista ligate a Al-Quaeda. Illo occurre in le quadro del guerra del Sahel, un conflicto que dura desde le principio del annos 2000.
Le assedio del urbe Mariupol in Ukrainia finiva le 16 de maio. Durante le dies sequente, 2 439 combattentes ukrainian se livrava al fortias armate de Russia. Ille combattentes se habeva refugiate in un fabrica de aciero que illes habeva fortificate. Un numero multo grande de minas ha essite placiate in le urbe per le belligerentes. Le fortias russe comenciava desde le 20 de maio le operationes de disminamento. Pois que le urbe es majoritarimente in ruinas, le disminamento essera probabilemente multo difficile. Secundo le Associated Press, le combattos in Mariupol ha occidite circa 600 civiles desde le principio de martio.
Charles de Foucauld, un officiero del cavalleria francese, pois explorator e geographo, e finalmente religioso catholic, eremita, e linguista, esseva canonisate le 15 de maio. Ille es cognite pro su labor de evangelisation con le Berberes in Africa del nord in le principio del vintesime seculo, habente studiate durante plus que dece-duo annos lor cultura, e publicante le prime dictionario tuareg-francese. Su labores ha devenite un referentia pro le cognoscentia del cultura tuareg. Le prime de decembre 1916, ille esseva assassinate al porta de su eremitage. Ille esseva considerate un martyre e esseva le objecto de veneration post le publication de su biographia in 1921. Su scriptos inspirava le creation de nove congregationes religiose, familias spiritual, e un renovation del monachismo eremitic.
Le 14 de maio, un terrorista armate e equipate de un gilet antiballas fusilava le personas presente in un supermercato de Buffalo, in le Statos Unite, occidente dece personas e vulnerante tres alteres. Le terrorista esseva apprehendite. Secundo le prime elementos del inquesta, il se tracta de un attacca motivate per racismo. De facto, le suspecto habeva publicate sur le rete un manifesto in le qual ille se describe como un suprematista blanc. Alicun dies postea, le 24 de maio, un viro de 18 annos entrante in un schola elementari in le urbe Uvalde, in le Statos Unite, occideva per ballas dece-novem infantes e duo inseniantes, e vulnerava dece-septe altere personas. Ille remaneva in le schola durante circa un hora ante que le policia entrava e le occideva. Il remane plure questiones concernente le inaction del policia durante le fusilada. Il se tracta del tertie plus grave fusilada in un schola, post le fusilada de 2007 a Virginia Tech e illo de 2012 a Sandy Hook.
In un referendum que habeva loco le prime de junio, le population danese votava pro poner un fin al exercitio del option de retirar le pais del politica de securitate e defensa commun del Union europee. Le organisation del scrutinio esseva un consequentia directe del invasion de Ukrainia per Russia in februario, que incitava le paises europee a reexaminar lor politica de defensa. Le projecto esseva approbate per un grande majoritate de plus que duo tertios del suffragios exprimite. Le governamento danese diceva que le resultato inviava un signal multo importante a su alliatos que le altere paises pote contar super Dania.
Le blog de Daniel Onesra 