Resister al «wokismo»

Is woke culture totalitarian? - UnHerd

(Per Matthieu Bock-Côté)

Le wokismo, apparite in le Statos Unite circa 2010, impone ibi su vision radical per un manipulation formidabile del linguage. Ultime avatar del politicamente correcte, illo se disveloppa in altere paises e representa un ver menacia pro le libertate de expression.

Ancora ante pauc tempore, le parola woke semblava pertiner al vocabulario reservate al campuses statounitese ubi on se crede in un cruciada pro le justitia social, specialmente re questiones de «racia» e de «genere», decidite a facer un processo definitive al mundo occidental e plus particularmente al viro blanc qui lo incarna in tote su abjection. Iste tendentia esseva cognite pro su extremismo e mesmo su fanatismo, convincite como illo esseva, e ancora es, de haber le monopolio del ver, del juste, e del bon. Barack Obama, in 2019, preveniva le studentes contra iste ideologia: ille videva ben que le pretention que illes se habeva eveliate coram un massa addormite, o esseva illuminate coram un populo captive del tenebras venite del passato, poteva solmente multiplicar le tensiones in un societate jam multo polarisate. Homine del sinistra, securmente, Obama tamen tentava rememorar iste juvenes que le natura human es turbide, e que il non es possibile reducer un conflicto social a un combatto inter le ben e le mal.

In alicun respectos, on pote discerner in le wokismo un nove unda del movimento associate al politicamente correcte que, desde le annos 1990, voleva decolonisar le universitate statounitese e su saper per le lucta contra le Dead White Male. Homero, Platon, Aristotele, Shakespeare, e tante alteres debeva esser combattite: lor omnipresentia pareva haber contribuite al marginalisation del saper e del perspectivas minoritari, con le quales il es possibile facer un revolution epistemologic e politic contra le civilisation occidental. Un nove relation con le mundo debeva se imponer. On se complaceva, a iste epocha, a derider isto e a se reassecurar que iste capricio non vadeva transversar le Atlantico. Assi non esseva. Absolutemente no. Le politicamente correcte se institutionalisava per le multiplication de departimentos e campos de studio universitari essentialmente fundate super le repudiation del civilisation occidental. Ab ora, isto es le lege in le universitates statounitese. Le wokismo es le puncto final de iste ideologia, e on non plus pote creder que illo es marginal.

Le wokismo escappava del campuses desde assatis longe tempore e se diffunde in le vita public in le maniera de un epidemia ideologic. Plus ancora, illo se impone in le corde del vita public del duo lateres del Atlantico, su conceptos se normalisa in le vocabulario mediatic, in le discurso politic, e in le administration. Illo colonisa le pensata collective o al minus su expressiones autorisate. Su militantes se trova in positiones de responsabilitate. Illo impregna le linguage del management e del publicitate. Iste sinistra religiose surge in le vita collective sub le signo del fanatismo, coram un classe politic que non sape vermente como lo responder o resister, e que es mesmo tentate de multiplicar concessiones a illo, sin comprender que il non se tracta de un movimento reformista portante revindicationes rationabile in le spatio public, compatibile con le logica democratic.

Tote le poter del wokismo veni de su manipulation orwellian del linguage: su theoristas e militantes inventa un novlingua diversitari que functiona in le maniera de un trappa ideologic. Le strategia del wokismo es transparente e mesmo revindicate in alicun casos: il se tracta de caper un parola colpate per un reprobation universal e lo collar un nove definition que on dice scientificamente validate, proque illo es legitimate per militantes disguisate como expertos causante damnos in departimentos de scientias social. Le exemplos es numerose: racismo, suprematia blanc, discrimination, odio o parolas odiose. Troppo sovente, le commentatores e le observatores qui son de bon fide se lassa abusar. Horrificate, como il se debe, per le signification traditional de iste parolas, illes non comprende que illos non plus reflecte le mesme realitate.

Assi, in le perspectiva woke, le racismo hodie non plus significa un ideologia que implica le discrimination racial o le hierarchisation de gruppos human secundo un criterio racial, cuje opposito es refusar de definir gentes secundo le color de su pelle. Le nove racismo accusa de daltonismo racial illes qui non consenti al racialisation del relationes social. Iste racismo se culminarea assi in le universalismo que servi como masca al interesses del «majoritate blanc». Apparentemente, on non plus lucta contra le racismo per passar preter le «racia» o per transcender lo, ma per supervalorisar le conscientia racial como un forma de identitate collective primari. Assi le antiracismo deveniva un racialismo ininhibite.

Le suprematia blanc, quanto a illo, non plus se refere al movimentos como le Klu Klux Klan o su descendentes, ma al structura profunde del societates occidental. Assi, le extreme sinistra racialista assimila le laicitate (le separation del ecclesias del stato) al suprematia blanc. Le concepto de discrimination es anque colpate. Le discrimination, pro le wokes, consiste in tractar totes del mesme maniera; inversemente, eliger alicuno secundo le color de su pelle, a condition que ille es considerate como pertinente a un «minoritate racial», non es discriminatori. Le odio, dunque, va solmente in un senso, es unidirectional: solmente le majoritate pote practicar le odio per refusar le definition que le chefs autoproclamate del minoritates pretende dar del homines que illes se dice representar. Nos ha assi un systema ideologic que functiona per inverter le signification del conceptos que illo revindica. Le wokismo nos face ambular super le testa. In le nomine del hygiene intellectual, on poterea continuar longemente iste exercitio de analyse del vocabulario wokista.

Al corde del wokismo, vos lo ha jam comprendite, le masculo blanc incarna le mal absolute. On radicalisa le politicamente correcte per passar del Dead White Male al masculo blanc vivente, qui deberea, pro comenciar su reeducation, se ingagiar in un processo de autocritica permanente que prendera le forma de un expiation sin redemption, nam le pathologias constituente su identitate es tanto profundemente inscribite in le processo de socialisation que le defini, que ille nunquam potera lo escappar completemente. Ma per denunciar se, per criticar su privilegios, per facer toto pro devenir le alliato del «minoritates», ille invia al minus le signal penitential desirate. Solmente assi ille retrovara, al fin, su humanitate o, al minus, potera camminar verso illo. Ille potera anque regratiar le personas «minoritari» pro le permission de camminar verso su «disblanchiamento».

Le unda woke pare destruer toto per su passage. Tamen il es necesse resister lo vivemente. On succedera solmente si on comprende su strategia de manipulation del vocabulario que face nos bascular in un mundo parallel, un mundo plen de definitiones alternative, que selige su relation con le real, e que obliga nos viver sub le autoritate de ideologos accusatores, judicante que istes qui les resiste merita le bannimento social — on parla non sin ration del «cancel culture». Ma isto implica anque de non se contentar per opponer al wokismo solmente le senso commun. In le facie de un pulsata ideologic violente que exerce un forma de incantation super le nove generationes, qui sovente cognosce nulle altere linguage que le sue, e qui son integralmente socialisate per le retes social ubi le wokismo domina, il es necesse retrovar le principios fundamental super le quales se appoia le civilisation que illes desira annihilar.

Fonte: https://lanef.net/2021/03/12/resister-au-wokisme/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Create your website with WordPress.com
Get started
%d bloggers like this: